Ўзбекистон Республикаси Президентининг «Аҳолини дори воситалари ва тиббиёт буюмлари билан таъминлаш тизимини такомиллаштириш бўйича қўшимча чора-тадбирлар тўғрисида»ги қарорига кўра мутасадди ташкилотлар қаторида Дори воситалари ва тиббий техника сифатини назорат қилиш бош бошқармасининг иш режасига ҳам бир қатор қўшимча вазифалар киритилди. Бошқарма бошлиғи ўринбосари, фармацевтика фанлари доктори, профессор Исмат АЗИЗОВ мухбиримизнинг саволларига жавоб бераркан, шундай деди:
– Мамлакатимизда соғлиқни сақлаш тизими фаолиятида ҳам том маънодаги янгиланиш ва ривожланишлар, қолаверса ушбу соҳанинг ҳар бир бўғини ва йўналиши бўйича амалга оширилаётган ислоҳотлар аввало, инсон манфаатларини таъминлашга қаратилгани билан ўта аҳамиятлидир.
Президентимиз Қарорига мувофиқ бошқармамиз ходимлари ва Ўзбекистон Республикаси Соғлиқни сақлаш вазирлиги мутахассислари билан биргаликда ижтимоий аҳамиятга эга дори воситалари ва тиббий буюмлар рўйхатини қайта кўриб чиқиб, рецептга асосан реализация қилинадиган дори воситаларини рўйхатга киритиш бўйича таклифлар тайёрлаш, шунингдек ижтимоий аҳамиятга эга дори воситалари ва тиббий буюмларга эҳтиёжни аниқлаш тартиби тўғрисидаги низомнинг янгиланган лойиҳасини ишлаб чиқиш ҳамда ижтимоий аҳамиятга эга дори воситалари ва тиббий буюмлар рўйхатини шакллантириш қоидаларини ишлаб чиқиш каби вазифаларнинг бажарилиши кўзда тутилган.