Фарзандини бирон тўгарак ёки қўшимча дарсларга олиб бормайдиган ота-онани бугунги кунда топиш мушкул. Боғча ёшидан бошлаб мактабга тайёрлов курсларида уларга турли тилларни, математиканинг бошланғич маълумотларини ўргатмоқчи бўламиз. Аммо боланинг ҳар томонлама ривожланиши учун таълим жараёни хилма-хил бўлиши, айниқса, мактабгача таълим даврида кўпроқ ижодий ишларга эътибор қаратиш кераклиги ёддан чиқмаяптимикин?
“Айболит”, “Бармалей”, “Телефон” каби эртак шеърлари билан ҳозиргача болалар қалбидан жой олиб келаётган рус адабиёти вакили Корней Чуковский ўзининг “Иккидан бешгача” номли асарида шундай ёзади: “Болаларнинг ҳаммаси иккидан беш ёшгача қай йўналишда ижод қилмасин, катталарни ҳайратга солувчи натижаларга эришади. Беш ёшдан кейин эса асл иқтидорларини намойиш эта бошлайдилар… шунингдек, улар билган, пухта эгаллаган билимларини намойиш этиш билан мақтанишни хуш кўрадилар. Бу бола “мен”ини ўстиришнинг ягона усулидир”.
Бола ижодкор бўлиши учун нималар керак? Аввало кичкинтой ички оламини бойитишни театрсиз тасаввур қилиб бўлмайди. Фарзандингиз боғчадан қолган кун: “Эҳ, бугун театр бор эди-ку!” деса ажабланманг. Театрнинг тарбиявий, эмоционал кучи беқиёс. Чарчаб инжиқлик қилмаслиги ва театр ҳақидаги биринчи таассуроти йўққа чиқмаслиги учун ёшни ҳисобга олиш зарур. Уч ёшли бола бир соатга мўлжалланган саҳна кўринишларини кузатишга жисмонан ва руҳан тайёр саналади. Унгача қўғирчоқлар ва қўлбола ясалган ҳайвончалар ёрдамида уйда ўзингиз 15 дақиқалик қисқа эпизодлар ташкил этинг. “Хонаки театрлар” ҳақиқий театр даргоҳига олиб боришга болада қизиқиш уйғотади. Театр боланинг дунёқарашини кенгайтириб, сўз бойлигини орттиради.
